ಕೊಲಂಬಿಯಾ ವಾಯುಪಡೆಗೆ ಸೇರಿದ ಹರ್ಕ್ಯುಲಿಸ್ C-130 (Hercules C-130) ಅಮೆಜಾನ್ ಪ್ರಾಂತ್ಯದ ಪುಟುಮಾಯೊದ ದುರ್ಗಮ ಪ್ರದೇಶವಾದ ಪೋರ್ಟೊ ಲೆಗುಯಿಜಾಮೊ ಎಂಬಲ್ಲಿ ಪತನಗೊಂಡಿದೆ ಎಂದು ಹೇಳಲಾಗಿದೆ. ಈ ವಿಮಾನವು ಸುಮಾರು 100 ಸೈನಿಕರನ್ನು ಹೊತ್ತೊಯ್ಯುವ ಸಾಮರ್ಥ್ಯ ಹೊಂದಿತ್ತು.
ರಕ್ಷಣಾ ಸಚಿವರ ಹೇಳಿಕೆ:
ಘಟನೆಯ ಬಗ್ಗೆ ತೀವ್ರ ಸಂತಾಪ ವ್ಯಕ್ತಪಡಿಸಿರುವ ಕೊಲಂಬಿಯಾದ ರಕ್ಷಣಾ ಸಚಿವ ಪೆಡ್ರೊ ಸ್ಯಾಂಚೆಜ್, “ಸೇನಾ ತುಕಡಿಗಳು ಈಗಾಗಲೇ ಸ್ಥಳಕ್ಕೆ ತಲುಪಿವೆ. ಆದರೆ, ಸಾವು-ನೋವುಗಳ ನಿಖರ ಸಂಖ್ಯೆ ಮತ್ತು ಅಪಘಾತಕ್ಕೆ ಕಾರಣವೇನು ಎಂಬುದು ಇನ್ನೂ ಅಧಿಕೃತವಾಗಿ ತಿಳಿದುಬಂದಿಲ್ಲ ಎಂದು ತಿಳಿಸಿದ್ದಾರೆ. ಅಲ್ಲದೆ, ಅಧಿಕೃತ ಮಾಹಿತಿ ಬರುವವರೆಗೆ ವದಂತಿಗಳನ್ನು ಹಬ್ಬಿಸಬೇಡಿ ಎಂದು ಅವರು ಮನವಿ ಮಾಡಿದ್ದಾರೆ. ಪ್ರಸ್ತುತ ಸ್ಥಳೀಯ ಅಧಿಕಾರಿಗಳಿಂದ ರಕ್ಷಣಾ ಕಾರ್ಯಾಚರಣೆ ಮುಂದುವರಿದಿದೆ.
ಅಧ್ಯಕ್ಷ ಗುಸ್ತಾವೊ ಪೆಟ್ರೊ ಆಕ್ರೋಶ
ಈ ದುರಂತಕ್ಕೆ ದೇಶದ ಆಡಳಿತಾತ್ಮಕ ವಿಳಂಬವೇ ಕಾರಣ ಎಂದು ಅಧ್ಯಕ್ಷ ಗುಸ್ತಾವೊ ಪೆಟ್ರೊ ಕಿಡಿಕಾರಿದ್ದಾರೆ. ಘಟನೆಯ ಬಗ್ಗೆ ‘X’ (ಟ್ವಿಟ್ಟರ್) ನಲ್ಲಿ ಪ್ರತಿಕ್ರಿಯಿಸಿರುವ ಅವರು ಕಳೆದ 15 ವರ್ಷಗಳಿಂದ ಸೇನೆಯ ಸಾಮರ್ಥ್ಯ ಕುಸಿಯುತ್ತಿದೆ. ಸೇನೆಯನ್ನು ಆಧುನೀಕರಿಸುವ ನನ್ನ ಪ್ರಯತ್ನಕ್ಕೆ ‘ಅಧಿಕಾರಶಾಹಿ ಅಡೆತಡೆಗಳು’ (Bureaucratic difficulties) ಅಡ್ಡಿಯಾಗಿವೆ.ಸೇನೆಯ ಆಧುನೀಕರಣದ ಹಣದಲ್ಲಿ ಒಂದು ಪೈಸೆ ಕಳ್ಳತನವಾಗಿದ್ದರೂ, ಅವರು ನಮ್ಮ ಸೈನಿಕರ ಕೊಲೆಗಾರರು ಎಂದು ಗುಡುಗಿದ್ದಾರೆ.
ಹಳೆಯ ಹೆಲಿಕಾಪ್ಟರ್ಗಳ ವೈಫಲ್ಯದಿಂದ ಉಂಟಾಗಿರುವ ಸಮಸ್ಯೆಯನ್ನು ನೀಗಿಸಲು ತಕ್ಷಣವೇ ಹೊಸ ಹೆಲಿಕಾಪ್ಟರ್ ಮತ್ತು ಸಾರಿಗೆ ವಿಮಾನಗಳನ್ನು ಖರೀದಿಸಲು ಆದೇಶಿಸಿರುವುದಾಗಿ ಅವರು ತಿಳಿಸಿದ್ದಾರೆ.
