ಅವರು ಜೆಎನ್ಎಂಸಿ ಕೆಎಲ್ಇ ಕನ್ವೇಷನ್ ಸೆಂಟರ್ನ ಡಾ.ಎಚ್.ಬಿ.ರಾಜಶೇಖರ ಸಭಾಂಗಣದಲ್ಲಿ ಜರುಗಿದ ಕೆಎಲ್ಇ ವಿವಿಧ ಕನ್ನಡ ಆಂಗ್ಲ ಮಾಧ್ಯಮ ಶಾಲೆಗಳು ಡಾ.ಪ್ರಭಾಕರ ಕೋರೆಯವರು ಕಾರ್ಯಾಧ್ಯಕ್ಷರಾಗಿ ೪೦ ವರ್ಷಗಳ ಅನುಪಮ ಸೇವೆಯ ಸಲ್ಲಿಸಿದ ಗೌರವಾರ್ಥ ರುಬಿ ಜ್ಯುಬಿಲಿ ಸಮಾರಂಭವನ್ನು ಆಯೋಜಿಸಿದ್ದವು. ಈ ಸಂದರ್ಭದಲ್ಲಿ ಅವರು ಸತ್ಕಾರವನ್ನು ಸ್ವೀಕರಿಸಿ ಮಾತನಾಡಿದರು.
ವಿದ್ಯಾರ್ಥಿಗಳಿಗೆ ಪಠ್ಯದೊಂದಿಗೆ ಪಠ್ಯೇತರ ಚಟುವಟಿಕೆಗಳಲ್ಲಿ ಪಾಲ್ಗೊಳ್ಳುವಂತೆ ಪ್ರೋತ್ಸಾಹಿಸಬೇಕು. ನನ್ನ ಬಾಲ್ಯದಲ್ಲಿ ಅತ್ಯುತ್ತಮವಾದ ಶಿಕ್ಷಕರನ್ನು ನೋಡಿದ್ದೇನೆ. ನನ್ನ ವಿಕಾಸಕ್ಕೆ ಅವರ ಕೊಡುಗೆ ಅನನ್ಯವಾಗಿತ್ತು. ನಿವೃತ್ತಿಯ ನಂತರವೂ ಅವರು ಇಂದಿಗೂ ಕ್ರಿಯಾಶೀಲವಾಗಿ ಚಟುವಟಿಕೆಯಿಂದ ಇರುವುದು ಕಂಡಿದ್ದೇನೆ. ಅಂತಹ ಕ್ರಿಯಾಶೀಲತೆ ಇಂದಿನ ಶಿಕ್ಷಕರಲ್ಲಿಯೂ ಬರಬೇಕು ಎಂದರು.
ಡಾ.ಕೋರೆಯವರು ವಿದ್ಯಾರ್ಥಿಗಳೊಂದಿಗೆ ಸಂವಾದವನ್ನು ನಡೆಸುತ್ತಾ, ಬಾಲ್ಯದಲ್ಲಿ ನಾವು ನೆಲೆದ ಮೇಲೆ ಕುಳಿತು ಶಿಕ್ಷಣವನ್ನು ಪಡೆದಿದ್ದೇವೆ. ಅಂದಿನ ಶಿಕ್ಷಣವು ಬಲಯುತವಾಗಿತ್ತು, ಗುಣಾತ್ಮಕವಾಗಿತ್ತು. ನಮ್ಮನ್ನು ಅಕ್ಷರದೊಂದಿಗೆ ಬೌದ್ಧಿಕವಾಗಿ ಬೆಳೆಸಿದ್ದವು. ನೈತಿಕ ಶಿಕ್ಷಣಕ್ಕೆ ಅವರು ಹೆಚ್ಚು ಆದ್ಯತೆ ನೀಡುತ್ತಿದ್ದರು. ಇಂದು ಅಂತಹ ಗಟ್ಟಿ ಶಿಕ್ಷಣದ ಅವಶ್ಯಕತೆ ಇದೆ. ಈಗ ಯುವಕರು ಕ್ಲಾಸಿಗೆ ಸೀಮಿತಗೊಂಡಿದ್ದಾರೆ. ಸಾಕಷ್ಟು ಅವಕಾಶಗಳು ಇವೆ. ಸ್ಪರ್ಧಾತ್ಮಕ ಪರೀಕ್ಷೆಯಲ್ಲಿ ಕುಳಿತುಕೊಳ್ಳಬೇಕು. ಅವರಿಗೆ ಆ ನಿಟ್ಟಿನಲ್ಲಿ ಶಿಕ್ಷಕರು ಉತ್ತಮವಾದ ಮಾರ್ಗದರ್ಶನ ಮಾಡಿಕೊಡುವುದು ಅಗತ್ಯವಾಗಿದೆ. ಇದರೊಂದಿಗೆ ಉತ್ತಮವಾದ ಆರೋಗ್ಯಕ್ಕಾಗಿಯೂ ಆದ್ಯತೆಯನ್ನು ನೀಡಬೇಕು. ಕೇವಲ ನೌಕರಿಗಾಗಿ ಕಲಿಯಬೇಡಿ, ಜ್ಞಾನ ಹಾಗೂ ನಾಯಕತ್ವಕ್ಕಾಗಿ ಅಧ್ಯಯನ ಮಾಡಿ. ಮಾತೃಭಾಷೆಯ ಮಹತ್ವವನ್ನು ನಾವು ಅರಿತುಕೊಳ್ಳುವುದು ಅಷ್ಟೇ ಪ್ರಧಾನವಾಗಿದೆ ಎಂದರು. ಡಾ.ಕೋರೆಯವರು ಮುಂದುವರೆದು ಮಾತನಾಡಿ ನನ್ನ ವಿಕಾಸಕ್ಕೆ ಗುರುಗಳೇ ಕಾರಣರು, ನನಗೆ ರಾಜಕೀಯ ಗುರುವಾದವರು ಮಾನ್ಯ ಎಸ್.ನಿಜಲಿಂಗಪ್ಪನವರು, ನನ್ನ ಕೌಟುಂಬಿಕ ಮುನ್ನಡೆಗೆ ನನ್ನ ಧರ್ಮಪತ್ನಿ ಆಶಾ ಕೋರೆಯವರು ಕಾರಣ. ಅವರ ಸಹಕಾರ ಸಹಾಯದಿಂದ ಸಮಾಜದಲ್ಲಿ ಸಂಸ್ಥೆಯಲ್ಲಿ ಕೆಲಸ ಮಾಡಲು ಸಾಧ್ಯವಾಯಿತು ಎಂದು ತಿಳಿಸಿದರು.
ಇದೇ ಸಂದರ್ಭದಲ್ಲಿ ಡಾ.ಪ್ರಭಾಕರ ಕೋರೆಯವರಿಗೆ ಎಲ್ಲ ಶಾಲೆಗಳ ಮುಖ್ಯಸ್ಥರುಗಳು ಸತ್ಕರಿಸಿ ಅಭಿನಂದಿಸಿದರು. ಅಂತೆಯೆ ಕ್ರೀಡೆಯಲ್ಲಿ ಅತ್ಯುತ್ತಮ ಸಾಧನೆಯನ್ನು ಗೈದ ೫ ವಿದ್ಯಾರ್ಥಿಗಳಿಗೆ ಪ್ರಶಸ್ತಿ ಪತ್ರದೊಂದಿಗೆ ಶಿಷ್ಯವೇತನ ಹಾಗೂ ಮುಂದಿನ ಶೈಕ್ಷಣಿಕ ಭವಿಷ್ಯತ್ತಿನಲ್ಲಿ ಅವರಿಗೆ ಬೇಕಾದ ಸೌಲಭ್ಯಗಳನ್ನು ನೀಡುವುದಾಗಿ ಡಾ.ಕೋರೆಯವರು ತಿಳಿಸಿದರು. ಈ ಸಮಾರಂಭದಲ್ಲಿ ವಿವಿಧ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿತ್ತು. ಮಕ್ಕಳು ನೃತ್ಯ ಹಾಡುಗಳನ್ನು ಅತ್ಯಂತ ಆಕರ್ಷಕವಾಗಿ ಜರುಗಿಸಿಕೊಟ್ಟರು. ತದನಂತರದಲ್ಲಿ ವಿಜೇತ ಮಕ್ಕಳಿಗೆ ಬಹುಮಾನಗಳನ್ನು ಪ್ರದಾನ ಮಾಡಿದರು. ಕೆಎಲ್ಇ ಆಡಳಿತ ಮಂಡಳಿಯ ಸದಸ್ಯರಾದ ಡಾ.ವಿ.ಎಸ್.ಸಾಧುನವರ, ಜಯಾನಂದ ಮುನವಳ್ಳಿ, ಬಿ.ಆರ್.ಪಾಟೀಲ, ಡಾ.ಪ್ರೀತಿ ಕೋರೆ ದೊಡವಾಡ, ಕೆಎಲ್ಇ ಜಂಟಿಕಾರ್ಯದರ್ಶಿಗಳು, ಆಜೀವ ಸದಸ್ಯರು, ವಿವಿಧ ಶಾಲೆಗಳ ಮುಖ್ಯಸ್ಥರು, ಶಿಕ್ಷಕರು ಉಪಸ್ಥಿತರಿದ್ದರು.
